#27 Жаз деми
Мемиреп жаз жыттанган аппак таңым,
Эргүүмдөн чыккан ырды сага арнайын.
Асманда Чолпон жылдыз көркүн кошуп,
Сезимди кытыгылайт ал ансайын.
Жазымдын жагым нуру дүйнө өбөт,
Жер жайнап байчечекей гүлүн төгөт.
Келгин куш түркүн үндө безеленип,
Дыйкандар мол түшүмдүн камын көрөт.
Ушинтип жаңыланат бүткүл дүйнө,
Жаз деми тоо-талаада, ар бир үйдө.
Тирүүлүк күүсүн чертип шаңкылдаган,
Табият таанылгыстай күндөн күнгө.
