#29 Жаз керемети
Кабылдап жаз айынын мүнөздөрүн,
Көркөмдөп көңүл сүйгөн сүрөттөрүн.
Көшүлгөн көп жылдарды көрүү максат,
Тариздеп тирүүлүктүн мүнөттөрүн.
Жылытса күндүн нуру денебизди,
Эстейбиз мээрим төккөн энебизди.
Жагымдуу жашыл килем токуп берген,
Биз анын кереметин сезебизби?
Эх, Жазым! Жер-Энени кулпунтасың,
Жашоого жандууларды умтултасың.
Кайрадан энчи берип, эркелетип,
Алдыга өмүр саатын жылдыртасың.
Жаз айым жарык сенин кабак-кашың,
Ажарың ачып турат сүйкүм назың.
Периште сыяктанып касиеттүү,
Улай бер пенделердин өмүр жашын.
