Кирпиктерим асманды шыпырышат,
Кош көздөрүм тоолорду сылап турат.
Көк шиберге жыгылсам кулач уруп,
Шылдыр булак жылгада жашайт кулап.
Шылдыр булак дайрага шашыларбы,
Дайра ташып деңизге ташыларбы?
“Ээн талаа,эрме чөл” жашоо тыптынч,
Жашагымды келтирет жашагымды.
Кол кармашып бөлүнбөйт тоолор жаны,
Былкылдабайт, тоготпойт атагымды.
Үшүп турган боз чымчык жаз чакырат,
Жашагымды келтирип жашагымды.
Акын. Кыргызстан Улуттук Жазуучулар Союзунун мүчөсү. “Кыргыз акын-жазуучулары” коомдук фондунун директору.
КРдин Улуттук жазуучулар союзунун Алыкул Осмонов атындагы Республикалык адабий сыйлыгынын, ТүркСОЙ эл аралык НИЗАМИ сыйлыгынын жана бир катар эл аралык жана республикалык сыйлыктардын ээси.
