|

“Жымжырттык жана жалгыздык…”

4.3/5 - (6 добуш)

* * *

Жымжырттык жана жалгыздык,
Жылаңач эрким шыкаалайт,
Жылжыган шорун көзүмдүн,
Жүзүмө сүртүп, укалайм.

Жыйрылган дүйнөм бошоңдоп,
Чындыкты карайм күзгүдөн,
Чаңдарын жуткан бороондун,
Чачымды тарак үзгүлөйт. 

Эшикти бирөө каккылап,
Эркимди бузуп салчудай,
Шаштырат сааттын жебеси,
Тузагын жайган аңчыдай. 

Уйкуга эрким жашынып,
Үңкүйгөн денем сүйрөлөт,
Ооздукка көнгөн оозумдан,
Бирөөнүн ою сүйлөнөт.

  • Акын. Жазуучу. Кесиби боюнча биолог. Биохимия лабораторияда лаборант болуп иштейт. Саламаттыкты сактоонун отличниги. “Адабий Ордо” сайты 2026-жылы уюштурган “Жаз” темасындагы бир ыр сынагынын жеңүүчүсү.

Бөлүшүңүз

Окшоштор

Жооп калтыруу

Сиздин email жарыяланбайт. Милдеттүү талаалар * менен белгиленген