С. У. га

Ар кимибиз ар кай жерде унчукпай,
акырындан түгөп, өлүп барабыз…
Көңүлүбүз көчө-көйдө кырсыктап,
көкүрөктө катмарланат кара муз…

Какшайт дүйнө… Какшайт ичиң, сыртың да,
карарган муз калчылдатат, карагым.
Бул жашоонун аркы бети сыйкыр да,
аппак, тунук окшойт аркы тарабы…

Ай ордунда, Жер огунда, Күн-карып,
күлүп тийип, күйүп батат ордуна…
Жашайм десең, жашоо турат кумсарып,
басам десең, башы баткак жол мына…

Өз башыбыз өзүбүзгө оор азыр,
тагдыр ушул күйсөң дагы, күйбөсөң…
Мен Кудайдан бакытымды доолашып,
башы баткак ушул жолдон күндө өтөм.

Желе басты акылды да, жүрөктү…
Кантип сайрайт капастагы булбулуң?
…Сен баары бир чындык үчүн күрөштүң,
мен эч кимге калп айтпадым бул жылы! 

Ар кимибиз ар кай жерде унчукпай,
акырындан түгөп, өлүп барабыз…
Көңүлүбүз көчө-көйдө кырсыктап,
көкүрөктө катмарланат кара муз…