Кылым каты
Кайыпсыңбы? Кандай жансың, кайдансың?
Караңгыда жарык чачкан айдайсың.
Азгыруубу? Аруу сезим сулуубу?
Алыс жүрүп жакын болуп алгансың.
Ойгонгондо көзүмдү ачсам уйкулуу.
Оюмда сен, бүт айлана супсулуу.
Айлуу түндө тоолор аппак, жапжарык.
Аяздуу кыш ызгаары да жыпжылуу.
Эгиз жандай ыраалаган шерик бейм?
Эргүү алам, ырлар жазам, зерикпейм.
Ашуулардан бут тосуулар толтура.
Ачууланбайм, ашык сөзгө терикпейм.
Сен гүлзарым жыпар жыты аңкыган.
Сезимдердин кайрыктары таңшыган.
Кылын чертип… кан жүгүртүп жүлүндөн,
кылымдарга тирүү сүйүү калтырам.
