|

“А дүйнөбү, бу дүйнөбү – билинбейт…”

Автору:Ажыканова Элмира
Көрүүлөрдүн саны: 73
5/5 - (6 добуш)

*   *   *

А дүйнөбү, бу дүйнөбү – билинбейт,
Асман, Жерби акылыма илинбейт.
Кайдан келип, кайда көчүп баратам
Асыл жаным алкымымда дирилдейт. 

Мелт-калт болуп агыламын кайдадыр
Менин жаным кайып дүйнө жайдадыр.
Беймарал, тынч жашайм деген өмүрүм
Аласалып агып кетер дайрадыр. 

Чыкпай жүрүп алкактардан, чектерден
Мен бакытка жолукпадым эч жерден.
Алып-учкан сезим менен жашадым
Акыл мага келген болсо кеч келген. 

Бир селт этип эки жагым карандым,
Биздин көчө. Аялдама. Караңгы.
Троллейбустан түшүп үйгө баратам
Козгоп алып жүрөктөгү жарамды. 

2024-ж. 26-апрель

Автор

  • Элмира Ажыканова

    1966-жылы 15-октябрда Талас районундагы Кум-Арык айылында туулган. Журналист, акын, жазуучу. КТРдин отличниги, республикалык «Айтыш» коому уюштурган «Мыкты аңгемелер» конкурсунун эки жолку жеңүүчүсү,  Махмуд Кашкари атындагы эл аралык сыйлыктын лауреаты, Байдылда Сарногоевдин 90 жылдыгына карата жарыяланган сынакта 3-орунга ээ болгон, маданияттын мыкты кызматкери, КР Ардак грамотасынын ээси.

    “Көгүш гүлдөр” (2007-ж.) ырлар жыйнагы, “Жан маанай” (2017-ж.) ырлар жана аңгемелер жыйнагы жарык көргөн.
Бөлүшүңүз
             

Окшоштор

One Comment

  1. Булуңунда бүтүн тагдыр көмүлгөн
    Буулукканда булак болуп төгүлгөн
    Тазалыгы таң калтырат бул ырдын
    Таштары да так түбүнөн көрүнгөн…

    Жооп берүү

Жооп калтыруу

Сиздин email жарыяланбайт. Милдеттүү талаалар * менен белгиленген