Көктөм эле
Оо, анда көктөм эле, көктөм эле,
Көр сүйүү көкүрөктө чөккөн эле.
Көрсө мен ойлоптурмун түбөлүк деп,
Бир сулууну эрдинен өпсөм эле.
Оо, анда көктөм эле, көктөм болчу,
Көз ачырбай көк жамгыр төккөн болчу.
Сулуу деле мен сыяк ойлогондур,
Ал да ошондо берилип өпкөн болчу.
Канчалаган көктөмдөр артта калып,
Кагазга чиймеленген кат да калып.
Кайдадыр мезгил шашып кетип барат,
Келекелеп, далыга таптап алып.
Ооба анда көктөм эле, көктөм эле,
Ойлогом көктөм кайда кетмек эле?
Ак аралап калганда сакалымды,
Андагыдай азыр ким өпмөк эле.
