Сен гана

Сен гана ээлеген бир эле,
Сен гана жашаган дил эле.
Сен гана эстелип түбөлүк,
Сен гана саласың күнөөгө.

Сен гана табылган сезимде,
Сен гана кабылган кезимде.
Сен гана үмүткө байлаган,
Сен гана чыкпаган эсимде.

Сен гана деп канча таарынам,
Сен гана башкача баарынан.
Сен гана жашаткан азаптан,
Сен гана бар үчүн арылам.

Сен гана саптарды жаздырып,
Сен гана кыялга мас кылып,
Сен гана жетелеп санаадан,
Сен гана өңүмдөн аздырып.

Сен гана ак шамым өчпөйсүң,
Сен гана бийиксиң чөкпөйсүң.
Сен гана мелтилдеп деңиздей,
Сен гана ак жаандай төкпөйсүң.

Сен гана сүйдүрүп бардыгын,
Сен гана жазылбас тагдырым.
Сен гана кең дүйнөм. Сезээрим…
Сен гана сенсиз жер тардыгын.

Сен гана күү болуп угулуп,
Сен гана күлмүңдөп кубулуп.
Сен гана түштөрдө жашайсың,
Сен гана ойлорго жуурулуп.

Сен гана жашоого үндөгөн,
Сен гана нур чачып күн менен.
Сен гана жылыткан дүйнөмдү,
Сен гана күткөнүм күндө мен.

Сен гана бакытка бөлөгөн,
Сен гана таяган, жөлөгөн.
Сен гана бал сезим тартуулап,
Сен гана багымды ээлеген.