Жылдызайга жооп

Менин башым мага таандык болсочу,
күндө күйүт, күндө арман, ый угат…
Тандагандар жашоонун чок ортосун,
билесиң да, эң биринчи жыгылат…

Жандалбастап улам айтып бир атын,
жардам сурап Жаратканды чакырам.
Качат, кайтат, эсим, каруу-кубатым,
болгону аны эл көзүнөн жашырам.

Менин дагы көңүлүмдү өлтүрүп,
мага дагы тардык кылат кең аалам…
Өзүм гана өзүмдү алдап, көндүрүп,
бул жашоого кайра кайрып келе алам…

Эркин дейсиң… Мен да сендей кысылам,
көп нерсеге көнбөй кыйнайт жүрөгүм…
Сен жашаган карт дүйнөнүн тушунан,
башты жерге салып өтүп жүрөмүн…

Эркин дейсиң… Кааласа, ким болбосун,
мен жөнүндө каалагандай айта алат…
Дүйнө мени ыйлата алат боздотуп,
максатым да сен күткөндөн майдараак…

Бактылууну карайм мен да уурданып,
сыртым салдым бул жашоого миң ирет…
Сындырган жок, бирок мени бир жарык,
чөгөлөтпөй кармады бир кудурет…

Эрлер дейсиң…  Көбү өзү жазгандай,
өз Мекенин бүтүн бойдон сүйө элек…
Шол эрлердин башы гана асманда,
буту жерде, түпкүлүгү түнөрөт…

Шол эрлердин дагы көбү мактанат,
бир чачымды, бир башымды тебелеп…
Мени, бирок дүйнө, адам, башка да,
мен күрөшпөй койгон үчүн жеңе элек…

Азыр мага Эрден, менден, андан да,
өйдөсүң сен, баатырсың да, батылсың.
Бала окутуп башаламан заманда,
билгениңди келечекке ташыйсың…

… Менин башым мага таандык болсочу?
Күндө күйүт, күндө арман, ый угат…
Тандагандар жашоонун чок ортосун,
билесиң да, эң биринчи жыгылат…