“Отуз түрлүү оюм сенсиң…”
* * *
Отуз түрлүү оюм сенсиң,
Отуз күндү ээрчиген.
Өбөк бол деп өмүрүмө,
Алгам сени энчилеп.
Сен жөнүндө кыял бүтпөйт,
Муңумдун да ээси сен.
Бар өмүрдүн ар күнүндө
Ойлор сени ээрчитет.
Ооба, кээде ойдолосоң
Тилек, мүдөөм бузулат,
Күлүк оюм тескери ооп,
Он эки айым тутулат.
Үмүтүм да сени менен,
Туура бүтүм чыгарар.
Кайчы жолго каршы турган,
Сүйүүм менин мунарам.
