“Ушундай кооз бир өтүгүм бар эле…”
* * *
Ушундай кооз бир өтүгүм бар эле,
Көпөлөк кууп, көлчүк кечкен кезимде,
Кыйбай көпкө кысканына кайылдай…
Кыйма жолго кеткен кезде тешилген.
Андан бери канча жаандар төгүлүп,
Көчөлөрдө көлчүк дале ошондой,
Көлөч кийген көлөкөм бар көлчүктө
Кыскан жолдо мууну-жүүнүм бошоңдойт.
Үнсүз, сөзсүз барам анан муңканып,
Бекем кармап турмуш деген тутканы,
Көпөлөк кууп, көлчүк кечкен кезимде,
Бакыт экен өтүгүмдүн кысканы.
