Вивальдинин төрт мезгили
Вивальдинин төрт мезгили,
тартып сыйкыр сыбызгы,
Табигаттын тамырын таап,
Улайт укмуш тыбышты.
А жандуулар арбалышып,
Азгырыктын койнуна,
Азап тилеп баштарына,
Арман үйөт мойнуна.
Жаратылыш сулуулугун
сунат, төрт кыл өзгөрүп,
Дарак кышта арууланып,
Жазда бийлейт көрктөнүп.
А адамдар далбас уруп,
Каяккадыр шашышат,
Тыңшап баспай табигатты,
Тырчып бара жатышат.
Куштар болуп айланага,
Куштар обон салгандай,
Вивальдинин сүрөттөгөн
Төрт мезгили майрамдай.
А адамдар… колун шилтеп,
Көөдөндөрүн кемитет,
Айды үмтөткөн азгырыгы,
Ай, жылдарын демитет.
Вивальдинин төрт мезгили,
Периштенин обону,
Тирүү туруп соолуп калуу,
Тирүүлөрдүн соболу.
