Тагдыр мени таштап ийбегин

Шилисинен басып асканын,
Чагылгандын издейм атканын.
Чатыр жасап алып жамгырдан,
Шамалдын мен сылайм чачтарын.

Боюн таштап бийик зоокадан
Шумкар учту, анын адаты.
Көздөрү анын жерди тытса да,
Көктү чийип барат канаты.

Бүт ааламды жарык кылат күн.
Айды көрөт аалам чынында.
Бүт ааламды шамал кыдырып,
Бүт ааламды тиктейм ырымда.

Көзөнөктөн чыгып, ийненин.
Жашоо мени жакшы ийледиң.
Көкөлөтүп көтөрүп чыгып,
Тагдыр мени таштап ийбегин.